سنين طويلة جداً جداً و أنا بشرح الجراحة لأولادى . الحقيقة في السنين دى هم احاطونى بكمية من الحنان والحب غير متخيله. وفعلاً هم أولادى . بخاف عليهم جداً وبقلق عليهم وكان أملى من سنين طويله قوى إن الشرح ده يبقى متسجل بطريقة شيك ومحترمة حتى كنت زمان أقول ما تسجلوش لانه مفيش ترتيب واضح وكان أملى في ده ولكن كان مشروع شكله ضخم جداً وبتخيل ده من الاحلام اللى في حياة كل واحد فينا له أحلام كده ومتصور انه حيعيش ويموت من غير ما يلحق يعملها فده كان من الاحلام اللى كنت بتمناها ولكن ما كنتش متخيل انه حيتم فبتوفيق ربنا سبحانه وتعالى والحمد لله إن الحلم ده بدأ يظهر بل ظهر اغلبه للوجود في صورة المحاضرات دى بتاعة الجراحة والمحاضرات دى في تصورى يستفيد منها جداً جداً جداً النوعيات الآتية :
طلبة طب بالذات عكس ما تتصور بتوع خامسة ورابعة في السنين التانية اللى هم بياخدوا حتة جراحة ومعندوش وقت ينزل الجراحة كلها فممكن يفتح على الحتة اللى عايزها ياخدها
طبعاً طلبة البكالوريوس
طلبة ماجيستير الجراحة بيبقوا خلاص كسلوا جدا فى انهم يزاكروا ومشغولين وبنكون وخدينه احنا من نباتجيه أول امبارح والامتحان بكرة وفى وسط ده لو سمع المحاضرات دى وخاصة اننى حطيت فيها خبرة حياتى كشغل كمان
طلبة الماجيستير اللى بيمتحنوا في الجراحة وهم مش جراحة زى ماجيستير العظام مثلاً وزى ماجيستير المسالك بيبقى عنده حاجات في الجراحة فممكن يفتح برضوا المحاضرات على الحاجات اللى عليه ويسمعها
كما يستفيد بها جداً زملائنا الجراحين اللى هم مثلاً خلصوا ماجيستير من خمس او ست سبع سنين او اكثر وبدأ يكسل يقرأ جداً. ومحتاجين نراجع الجراحة كل شوية يا جماعة.
انا بعمل كده مع نفسى كل كام سنة براجع الجراحة كاملة كما لو كنت طالب. كتاب يكون فيه آخر حاجة واقرأه تانى حتى في اللى انا حاسب نفسى انى عارفه ولكن بقابل حاجات مفاجآت أحيانا حاجات في حياتنا مهمة فبرضو الجراحين دول ممكن يكون كسل يقرأ فخلاص وهو قاعد في عيادته ممكن يسمع كل مرة شريط ولا حاجة يقدر يراجع الجراحة كلها
اتمنى ان الشرائط دى تسعدكوا وتخدمكوا وبحاول افكر ازاى سهولة وصول كل واحد ليها بإذن الله ، وياريت حتى أولادنا اللى في الدول العربية ابعتوا الكلام ده ليهم وبلغوهم بيه وشجعوهم عليه . انا اظن حيستفيدوا منه جداً جداً.
شكراً شكراً يا رب يخليكوا وافرح بيكوا واطمن عليكوا.